Қазақстан халқының бірлігі күні қарсаңында Қарағанды Бөкетов зерттеу университетінде "Бір шаңырақ астында" фестивалі өтті, оның мақсаты халықтар арасындағы достықты нығайту және студенттер арасында достық қарым-қатынасты қалыптастыру. Іс-шараға оқытушылар, студенттер, университет қызметкерлері және демеушілер қатысты. Басқарма Төрағасы-ректорының міндетін атқарушы Еркеблан Тәжбаев құттықтау сөз сөйлеп, Қазақстан – бірлігі мен ынтымағы жарасқан көпұлтты мемлекет екенін, сондай-ақ еліміздің басты өзегі және жалпыұлттық бірегейлікті нығайтатын негізгі фактор – бірлік екенін атап өтті. "Студенттеріміз ұйымдастырған бүгінгі іс-шара Қазақстан халқының біртұтас ел екенін тағы да бір мәрте дәлелдей түсті. Сонымен қатар бәріміз бір елдің азаматы ретінде мемлекетіміздің өркендеуіне күш салуымыз керек", - деп атап өтті. Фестиваль барысында 12 факультеттің студенттері Қазақстан Республикасында тұратын халықтардың мәдениетімен, дәстүрлерімен және тағамдарымен таныстырды. Сондай-ақ, іс-шара аясында қайырымдылық жәрмеңкесі өтті, онда азық-түлік және әшекей бұйымдар сатылды. Жәрмеңкеден жиналған 700 мың теңге су тасқынынан зардап шеккен Солтүстік Қазақстан өңіріне көмек ретінде жіберілетін болады.
